Notizia Celestiale

(a Benito & Silvana Caruso) 

Apriti li finestri e li barcuni

porti e vaneddi svalancati

trasinu passareddi e arcuni

annu cosi di diri, attintati

Vennu di la zona Italiana

di brucculinu si sunnu partuti

portanu novi di donna silvana

attintati tutti, e stati muti

Na sira lu celu era sirenu

li stiddi luscianu a mighiara

cantavanu li grilli `nta lu fenu

Benitu abbrazzava a la so cara

Ni l`aria na musica gilestiali

tutti l`asceddi cantavanu a coru

l`angili cu cupito sutta l`ali

circavanu dunni pusari un tesoru

La luna chianu, chianu scumparia

lu suli a mala appena s`affaciava

donna Silvana china d`alligria

un vasuni a Benitu regalava

Cu l`alba vinni puru l`arcubalenu

la chiesa Madri a festa sunava

la Marinuzza strincia a lu senu

un sciuri, chi pò a Silvana dava.

di: Vito Bologna