FATIMI CUNTENTU

Sentimi frati me, tu chi ritorni

a ddu paisi chi picciotti lassamu

va ni la chiazza e li so dintorni

e cunta a tutti chi vita passamu

Dicci chi la vita di emigratu

nne` tutta oru,comu luci

dicci chi lu me cori unne` ingratu

e notti e ghjornu iu sentu ddi vuci

La voci di lu zu masi, lu vinnituri

mentri abbania calia e simenza

la vuci di zappula lu gran tinuri

mentri chi a la radiu canta "SENZA"

dicci chi sulu a sentiri parrari,

lu Sicilianu, m`arrizza la peddi

dicci chi lu cori mai po scurdari

la bedda Sicilia cu li so casteddi

E siddu`nta sta terra iu moru

`nta lu nutaru fici tistamentu

purtati st`ossa ni la conca d`oru

e l`ultimu disiu, fatimi cuntentu.

di: Vito Bologna